Cafwyd y syniad o gynnal Gŵyl Geltaidd yn nechrau 1970. Ffurfiwyd pwyllgor yn Killarney i edrych ar y posibilrwydd o drefnu Gŵyl yn y gwanwyn. Cafwyd sawl cynnig, gan gynnwys digwyddiad Geltaidd gan Con O Connaill. Dewisiwyd “Gŵyl Gerdd Bach” (y cyfansoddwr) gan y pwyllgor, ond penderfynnodd Con O Connaill fynd ymlaen i geisio trefnu Gŵyl Geltaidd ar ei liwt ei hun.

Ym Mai 1971 cynhaliwyd yr ŵyl geltaidd gyntaf, yr “Wythnos Ban Geltaidd”. Yr unig gyfrannogwyr o du allan i Iwerddon oedd dau o Gymru ( Meredydd a Phyllis Evans), a phump o Lydaw ( grwp Les Tregerez ac Alan Stivell).

Yn dilyn Gŵyl 1971, ar ôl awgrymiad gan Meredydd Evans, daeth Con O Connaill drosodd i’r Eisteddfod Genedlaethol i sefydlu cysylltiadau. Yn dilyn hyn ymwelodd â’r gwledydd celtaidd eraill gan sefydlu cysylltiadau ym mhob un, a’r cysylltiadau yma ffurfiodd gnewllyn y pwyllgorau. Mewn canlyniad daeth cynrychiolwyr o’r Alban, Llydaw, Cymru, Iwerddon, Cernyw ac Ynys Manaw i gymryd rhan yng Ngŵyl 1972.

Yn ystod Gŵyl Pan Geltaidd 1972 cafwyd cyfarfod ble y penderfynwyd sefydlu strwythur a gofynnwyd i Con O Connaill gynhyrchu drafft o gyfansoddiad a’i anfon i bawb oedd yn bresennol. Y bwriad oedd i bawb astudio a gweithio ar y drafft cyn Gŵyl 1973.

Cafodd y cyfansoddiad ei fabwysiadu mewn cyfarfod yn ystod y Gŵyl Pan Geltaidd 1973 ac yn fuan wedyn sefydlwyd chwe pwyllgor cenedlaethol yn cynrychioli diddordebau eu gwledydd.

Cynhaliwyd yr ŵyl yn Killarney tan 1990 pan benderfynnwyd newid lleoliad gan fod y gefnogaeth yn dechrau pallu. Cynhaliwyd yr ŵyl yn Galway (1991-1994), Tralee (1995-96), Ennis (1997) a wedyn dychwelyd i Tralee (1998- 2000). Ni allwyd cynnal Gŵyl yn 2001 oherwydd y clefyd traed a’r genau. Bu’r ŵyl yn Kilkenny (2002-2003), Tralee (2004 – 2005) a Letterkenny (2006 a 2007).

Y prif nôd yn ôl cyfansoddiad yr Ŵyl Ban Geltaidd yw i hyrwyddo a meithrin ieithoedd, diwylliant, cerddoriaeth, canu a chwaraeon Celtaidd, ac i annog cyfnewid gwybodaeth a thwristiaeth traws - Geltaidd yn y gwledydd Alba, Breizh, Cymru, Éire, Kernow a Mannin.